Yɛhwɛ akwaa ahodoɔ a ɛwɔ nipadua no mu a, adɔkotafoɔ kyerɛ sɛ brɛboɔ no ne akwaa a ɛso pa ara yie. Yɛyi adwene no firi hɔ a, ɛno na ne dwumadie dɔɔso pa ara. Brɛboɔ no wɔ dwumadie soronko bi a ɛtumi di ma ne ho, ɛno ne sɛ, ɛno ankasa tumi siesie ne ho berɛ a kyemateɛ bi aba ho. Ɛba nipadua no mu a, brɛboɔ no hyɛ yɛn yafunu no nifa so.
Onipa biara hia brɛboɔ sɛ ɛbɛdi dwuma bebree de aboa nipadua no. Ne tɔfabɔ mu no, dwuma ahodoɔ a ɛdidi soɔ yi na brɛboɔ no di de boa nipadua no.
1. Brɛboɔ no boa sɔne mogya a ɛgye firi nsono ne akoma mu no so.
2. Brɛboɔ no kyi nsuo bi a yɛfrɛ no sɛ bɔnwono ma no yam nnuane a sradeɛ wɔ mu.
3. Bio, ɛboa sie nnuanennuro bi te sɛ vaetamen A, D, E ɛnna K ɛma nipadua no tumi de di dwuma wɔ berɛ a ɛsɛ mu.
4. Deɛ ɛtwa toɔ koraa no, brɛboɔ no boa te ɛborɔ a ɛfiri nnuro ne nsa ahodoɔ a yɛnom mu no so, sɛdeɛ ɛrennya nsunsuansoɔ bɔne kɛseɛ wɔ nipadua no so.
Nsɛnkyerɛnneɛ ahodoɔ a ɛda adi wɔ brɛboɔ mu yadeɛ ho.
Hyɛ no nso, nsɛnkyerɛnneɛ a ɛda adi wɔ brɛboɔ mu yadeɛ ho no taa ne yadeɛ ahodoɔ binom nsɛnkyerɛnneɛ sesɛ, ne saa nti sɛ wohunu nsɛnkyerɛnneɛ ahodoɔ a ɛdidi soɔ yi a, bɔ mmɔden kɔhunu wo dɔkota. Ebia na ɛyɛ brɛboɔ mu yadeɛ anaa yadeɛ foforɔ bi na ɛreda ne ho adi. Afei momma yɛnhwɛ nsɛnkyerɛnneɛ no.
1. Obi nya brɛboɔ mu haw a, ɛtumi ma ne bo taa fono no, na ɔsane nso taa fefe.
2. Nipa no ani nkosua fitaa no tumi sesa bɛyɛ sɛ akokɔsradeɛ.
3. Ne kɔn ntaa nnɔ aduane, na ɛnam ɛno so tumi ma ne so te.
4. Ne dwonsɔ ani tumi sesa. Berɛ a anka ɛsɛ sɛ dwonsɔ no ani yɛ akokɔsradeɛ kakra anaa hoyaa no, ani tumi yɛ tumm anaa dodoeɛ.
5. Ne yafunu tumi yɛ kɛse ma ɔte yea, titire wɔ ne nifa so ɛnam sɛ brɛboa no ahonhono no nti.
6. Ne honam nyinaa tumi yɛ ne mmerɛ, na ɛsane nso yɛ no ya. Ne wedeɛ mu taa yɛ no hodwoo.
7. Ne nan ase tumi pagyapagya, ma ɔde ne nsa mia a ɛtɔ mu.
8. Deɛ ɛtwa toɔ koraa no, honam ani ahoɔhene tumi te si nipa no so.
Deɛ ɛde brɛboɔ mu yadeɛ ba, anaa nneyɛeɛ a ɛtumi kɔfa brɛboɔ mu yadeɛ ba.
1. Nsane yadeɛ a ɛnam yadeɛ mmoa a wɔn ani yɛ den bi te sɛ barɔso a broni frɛ no sɛ ‘virus’s no tumi ha brɛboɔ no. Saa yadeɛ mmoa yi tumi kɔ nipadua no mu ne titire ne berɛ a nna mu nkitahodie akɔ so no.
2. Nsadenom mmorosoɔ nso tumi sɛe brɛboɔ no.
3. Sradeɛ nnuanedie ne nammonodie bebree tumi ha brɛboɔ no.
4. Nnuro bebree a yɛkɔtɔ nom wɔ berɛ a dɔkota ntwerɛ mmaa yɛn no tumi kɔfa brɛboɔ mu yadeɛ ba. Ne titire ne nnuro a yɛnom de ko nipadua mu yea ne deɛ mmarima taa nom de fa mmaa.
5. Anonneɛ ahodoɔ a yɛtaa nom, ne titire ne deɛ yɛde pɛ ahoɔden.
6. Nkyenedie bebree.
7. Kɛseyɛ mmorosoɔ.
Ɔkwan a yɛbɛfa so abɔ yɛn ho ban afiri brɛboɔ mu yadeɛ ho.
1. Ɛsɛ sɛ yɛtwe yɛn ho firi nsaden ne tawanom bebree ho.
2. Ɛsɛ sɛ yɛte sradeɛ ne nammono nnuanedie bebree so.
3. Yɛmmɔ mmɔden sɛ aduro biara a yɛde kɔ yɛn nipadua no mu no yɛ deɛ dɔkota atwerɛ ama yɛn.
4. Yɛmmɔ mmɔden sɛ yɛbɛtwe yɛn ho afiri anonneɛ ahodoɔ a yɛnom de pɛ ahoɔden no ho.
5. Yɛnte yɛn nkyenedie so.
6. Yɛmmɔ mmɔden sɛ yɛbɛtenetene yɛn apɔm de asi kɛseyɛ mmorosoɔ ano.
7. Yɛmmɔ mmɔden sɛ yɛbɛdi nnuane a ntɛtɛ wɔ ho bebree.
8. Afei, yɛmmɔ mmɔden sɛ yɛbɛdi nnuane a ɛboa brɛboɔ no apɔmuden, bi te sɛ gyeene, anwoo, akekaduro, akutoɔ ne atosodeɛ ahodoɔ.
Kakra yi ne deɛ yɛbɛtumi ahwɛ afa brɛboɔ mu yadeɛ ho. Ma w’ani nkɔ wo nipadua no mu akwaa biara ho, na wowɔ nkwa a na wowɔ ade. Bɔ mmɔden sɛ wobɛkyɛ adesua yi ama afoforɔ na wɔn nso anya mu kyɛfa.
