Ghana yε ᴐman a akᴐ nkoasom mu pεn. Yεntumi nka Ghana abakᴐsεm nyi ne nkoasom a ᴐkᴐᴐ mu no mfiri mu, εfiri sε ne nyinaa ka ho na εbᴐ mua. Yεate sε Ghana akᴐ nkoasom mu, na εno na yεn mu pii de yεn adwene di akyire, nanso deε εwᴐ sε yεhyε no nso ne sε εnyε amanᴐne man baako pε na εbεfaa ᴐman no nnomum. Aman bεyε nnum anaa deε εboro saa mpo na wᴐbaa Ghana. Wᴐn mu biara ne dwuma a wᴐbεdii no ᴐman no mu. Obiara botaeε a ᴐde baeε yε edwadie deε, nanso εno ara mu no, wᴐnam so bεfaa ᴐman no nnomum, na wᴐyeyεε agyapadeε binom wᴐ ᴐman no mu. Atwerε yi bεbue ᴐman a εdi kan a εbεfaa Ghana nnomum so aka ho asεm kakra.
Ↄman a εdii kan wiraa Ghana a na wᴐfrε no Sika Mpoano mu bεdii dwa na wᴐnam so faa ᴐman no nnomum ne Portugal foᴐ. Wᴐn nnomumfa no sii wᴐ mfeha 15 no mu wᴐ 1471 mu. Wᴐde edwadie botaeε na εbaeε, nanso wobεhunuu sika kᴐkᴐᴐ pii wᴐ Asutene Ankobra ne Asuo Firaw mu. Wei maa wᴐn botaeε no sesaeε. Wᴐtoo beaeε a wᴐhunuu sika kᴐkᴐᴐ no din sε “da Mina”, a asekyerε ne sε “Agudetubea”. Portugal foᴐ a wᴐfrε wᴐn Portuguese yi sii Aban a εdi kan koraa wᴐ Edena (Elmina) a εwᴐ Sika Mpoano. Saa mfeha no mu no, Portuguese yi yeyεε agyapadeε, sisii adan wᴐ mpoano hᴐ a na wᴐn anisoadehunu ne sε wᴐbεnya sika kᴐkᴐᴐ pii. Wᴐde edin “Portuguese Sika Mpoano” too Abibirem Atᴐeε man Sika Mpoano so (εnnε Ghana).
Wᴐhyεε nnomumfa no ase wᴐ 1482 mu. Wᴐn na wᴐdii kan de nnᴐnkᴐ dwadie baa ᴐman yi mu, na mmom na wᴐn deε no yε deε na wᴐyε no beaeε a na wᴐdi soᴐ no nko ara. Wᴐde nhyε firii amammuo adwa a na wᴐte soᴐ wᴐ Sao Jorge de Mina, a na εno ne Edena (Elmina) baeε maa wᴐhyεε nnᴐnkᴐ dwadie ase. Wᴐde nnᴐkᴐ dwadie mu ayᴐnkofa kεseε baeε a na wᴐhunu no sε wᴐn amammuo no akyi no, εbεtumi atintim na aterε wᴐ saa beaeε no. Ade titire a na wᴐmane firi ᴐman yi mu ne sika kᴐkᴐᴐ a na wᴐnam edwadie so nya (na temamufoᴐ no de sika kᴐkᴐᴐ bεsesa gye nneεma binom a na εhia wᴐn). Na wᴐtotᴐ nnua ne fam agudeε ahodoᴐ binom nso.
Portugal foᴐ mmaeε a wᴐbaa Sika Mpoano bεfaa ᴐman no nnomum no bεhyεε apofosεm ne edwadie mu kena maa no yεε kεse. Wᴐde Amerika aduadeε ne mfudeε bi te sε aburo ne bankye bεhyεε Abibiman kuayε mu. Portuguese kasa no bεgyee nhini wᴐ edwadie mu, na εnam so maa ᴐman no fa bi fεmm wᴐn kasa no bi a ebi ne “Paano”.
Dutch foᴐ ne Portugal foᴐ de gengamm mu wᴐ ᴐsa kεseε mu a na εnyε agorᴐ koraa. Dutch foᴐ dii Portugal foᴐ so nkunim wᴐ ᴐsa no mu. Wᴐn nkugudie no akyi no, wᴐnam mmara kwan so danee wᴐn amammuo no de maa Dutch foᴐ maa wᴐde kaa mmeaeε a wᴐafa wᴐn nnomum no ho.
