Nnwodoweɛ yɛ yadeɛ a ɛsi wɔ adwene no mu. Ɛyɛ berɛ a mogya a ɛnam ntini no mu kɔ adwene no mu kwan asi, sɛ ɛkɔba no saa a mogya no ntumi nkɔ adwene no mu, na ɛtumi ma adwene no nkwammoa wu ɛfiri sɛ ɛnnya mframa pa ne nnuanennuro mfiri mogya a ɛsɛ sɛ ɛdi aforosianeɛ ba hɔ no ho.
Akwan ahodoɔ mmienu na ɛnam so ma nnwodwoeɛ yadeɛ yi si wɔ nipadua no mu. Deɛ ɛdi kan yɛ sɛ mogya ntumi nnya kwan nkɔ adwene no mu ɛnam sɛ biribi asi ntini no kwan nti.
Deɛ ɛtɔ so mmienu yɛ sɛ ntini a mogya nam mu de kɔ adwene no mu bɛpae ama mogya anwunu agu adwene no ho.
Nnwodwoeɛ yɛ yadeɛ a ɛtwa sɛ yɛtwe yɛn adwene kɔ so ntɛm, na yɛtumi si ano nso ntɛm.
Nsɛnkyerɛnneɛ a nnwodwoeɛ yadeɛ da no adi
Sɛ wo ankasa anaasɛ obi a wonim no nya nnwodwoeɛ yadeɛ a, bɔ mmɔde sɛ wobɛhyɛ nsɛnkyerɛnneɛ a ɛda adi no nso ɛfiri sɛ wohunu no ntɛm de kɔ ayaresabea ntɛm a, ɛtumi boa ma adɔkotafoɔ hunu kwan a wɔbɛtumi afa so asi ano nso ntɛm. Ma yɛnhwɛ nsɛnkyerɛnneɛ a ɛda adi wɔ nnwodwoeɛ yadeɛ yi ho.
1. Nipa a ɔwɔ yadeɛ no nya haw wɔ ne kasa mu. Ne nteaseɛ wɔ asɛm ho kɔ akyire. Ne kasa yɛ nyaa anaasɛ obi kasa ne ho a, ɔte deɛ nanso ɔnnya mu nteaseɛ.
2. Saa nipa yi anim, ne nan anaa ne nsa tumi dwodwo mpofirem. Saa nnwodwoeɛ yi tumi si wɔ nipadua no fa. Obi pɛ sɛ ɔhunu sɛ ɔreyɛ anya nnwodwoeɛ yadeɛ a, ɔbɛtumi ama ne nsa mmienu so akɔ soro, ne nsa no mu deɛ ɛbɛgye ne ho aba fam no bɛkyerɛ sɛ saa nipadua no fa na nnwodwoeɛ reka no no.
3. N’ani baako anaa mmienu no nyinaa hyɛ aseɛ sɛ ɛreyɛ wisiwisi anaa tumm mpofirem. Ebinom nso hunu adeɛ mmienu mmienu.
4. Ebinom tumi nya tipaeɛ a ano yɛ den mpofirem, a ɛtaa kɔfa ɛfeɛ ne anisobiri ba.
5. Nanteɛ ho yɛ no den. Ɔbɔ ne ho mmɔden sɛ ɔrenante nso a, ɔkɔ afaafa.
Nneɛma ahodoɔ a ɛde nnwodwoeɛ yadeɛ ba
1. Wɔn a wɔwɔ mogyaborosoɔ na wɔntu ho anammɔn anaa wɔnhwɛ so nnum wɔn nnuro tumi ma wɔnya nnwodwoeɛ.
2. Wɔn a wɔn ntini a mogya nam mu no asoa anaa ahono.
3. Wɔn a wɔanya akwanhyia ama wɔn ntini no bi pae.
4. Asikyire yadeɛ tumi kɔfa nnwodwoeɛ ba.
5. Wɔn a wɔnom nnuro a ɛnane mogya a abɔ ntoa wɔ wɔn mu ma no boro so.
Yɛn ankasa nneyɛeɛ anaa nnoɔma ahodoɔ bi a ɛbɔ kwan ma nnwodwoeɛ
1. Kɛseyɛ mmorosoɔ
2. Obi a ɔntaa ntenetene n’apɔm
3. Wɔn a wɔnom nsaden ma no boro so.
4. Wɔn a wɔwɔ mogyaborosoɔ
5. Wɔn a wɔwɔ asikyire yadeɛ
6. Wɔn a wɔtaa di nnuane a sradeɛ wɔ mu na adɔɔso wɔ mogya no mu.
7. Wɔn a wɔwɔ abakɔsɛm fa nnwodwoeɛ yadeɛ ho wɔ wɔn abusua mu.
8. Wɔn a wɔn mfeɛ kɔ anim, ne titire ne wɔn a wɔn mfeɛ no firi aduonum nnum rekɔ soro
Kwan ahodoɔ a yɛbɛtumi afa so asi nnwodwoeɛ yadeɛ ano.
1. Bɔ mmɔden sɛ wobɛhwɛ anom wo nnuro sɛdeɛ dɔkota akyerɛ wo.
2. Hwɛ sɛ wonni nnuane a sradeɛ wɔ mu bebree.
3. Twe wo ho firi nnubɔne bi te sɛ taawa nom ho.
4. Wowɔ asikyire yadeɛ a, nom wo nnuro no berɛ ano berɛ ano sɛdeɛ dɔkota akyerɛ wo.
5. Tenetene wo mpɔm
6. Twe wo ho firi nsaden nom ho.
Nnwodwoeɛ yɛ yadeɛ bɔne te sɛ yadeɛ a aka no nyinaa ara. Seesei a wo ho yɛ wo den na wonni mmerɛyɛ biara no, bɔ wo ho mmɔden pa ara sɛ wobɛhyɛ saa akwan ahodoɔ a wobɛtumi de asi ano no nso, na tu ho anammɔn sɛdeɛ sɛ. Ɛyɛ pii sɛ wobɛtu ho anammɔn seesei wɔ asomdwoeɛ mu sene sɛ yadeɛ no bɛbɔ wo awie na wode yea ne ɔbrɛ apɛ ho anosie.
