Yɛka atommudeɛ ne atosodeɛ ahodoɔ a yɛde noa nnuane ma nnuane tu hwa na ɛyɛ dɛ a, mako di mu akotene pa ara. Wonoa aduane na woamfa mako anto mu a, worentumi nte aduane no dɛ sɛdeɛ ɛsɛ. Bio nso, sɛ mako nni aduane binom mu a, ɛtumi ma aduane no yɛ nyan pa ara, titire ne nnuane a wɔde nam mono anoa.
Nnipa binom taa de mako noa wɔn nnuane sɛdeɛ ɛbɛyɛ a wɔbɛtumi ate aduane no dɛ nanso afoforɔ deɛ, sɛ mako a ɛwɔ aduane no mu nnɔɔso a, wɔntumi nni. Ɛno nti, wɔtumi de mako pii noa nnuane no ma no boro so. Enti wohwɛ a, sɛ yɛdi mako pii a, nsunsuansoɔ bi wɔ mu, anaa ɔhaw biara nni ho?
Ansa na yɛbɛyi saa asɛmmisa yi ano no, ma yɛnni kan nka mfasoɔ binom a yɛnya firi mako mu ho asɛm.
Animdefoɔ kyerɛ sɛ, yɛnya nnuanennuro binom te sɛ Kalsium, protein, potasium, magnisium, kabohaedreti, ne Vaetamɛn C ne B6 firi mako mu. Yei nti, mako ho hia wɔ nipadua no mu pa ara. Adeɛ a ɛwɔ mako mu a ɛma ano tumi yɛ hye no, wɔfrɛ no kapsasin.
Mako so mfasoɔ binom ne sɛ:
1. Ɛboa ma akoma no tumi yɛ adwuma yie
2. Ɛma nipa apɔ so yɛ den na ɛtumi sa nnompe mu yaw
3. Ɛtumi ma onipa so te
4. Ɛboa ma onipa kwati yareɛ bi te sɛ kokoram ne afoforɔ binom
5. Ɛma onipa nkwammoa tumi yɛ adwuma yie sɛdeɛ ɛbɛyɛ a yɛbɛnya apɔmuden pa
Yeinom ne mako so mfasoɔ binom wɔ nipadua no mu. Nanso deɛ ɛsɛ sɛ yɛhyɛ no nso ne sɛ, yɛnya saa mfasoɔ yinom berɛ a yɛadi mako sɛdeɛ ɛsɛ. Mmom, sɛ yɛdi mako pii ma no boro so a, ɔhaw ahodoɔ a ɛbɛtumi de abrɛ yɛn no mu binom na ɛdidi soɔ yi.
1. Yafunu yareɛ
Wodi mako pii a, ɛbɛtumi ama woanya yafunu yareɛ. Mako pii kɔ yafunu no mu a, berɛ a ayam awie no, kapsasin a ɛwɔ mako no mu no tumi fra ased a ɛwɔ wo yafunum no. Ɛkɔba saa na woyɛ obi a wowɔ kuro wɔ wo yafunum a, ɛbɛtumi ama woate yea a ano yɛ den wɔ wo yafunum, na ɛbɛtumi nso ama ekuro a ɛwɔ wo yafunum no atrɛ.
Yei nti, animdefoɔ kyerɛ sɛ, ɛsɛ sɛ nnipa a wɔwɔ yam kuro nyinaa twe wɔn ho firi mako ho. Wɔka sɛ, wodi mako pii saa a, ɛbɛtumi ama wo yam ayɛ wo ya pa ara, wobɛtumi nso anya ayamtuo, na ɛbɛtumi ama wo to ahyehye wo berɛ a woregya wo nan.
2. Ntehyeewa
Obi yare ntehyeewa na ɔdi mako pii a, ɛbɛtumi ama ne yareɛ no aka ne ho. Animdefoɔ kyerɛ sɛ, sɛ mako no fa baabi a mframa nam wɔ nipadua no mu a, ɛbɛtumi ama ntehyeewa no ama ne homene so. Ɛba saa na sɛ onipa no nni aduro wɔ ne nkyɛn anaa obiara nni nkyɛn a, ɛbɛma ne ho akyere no pa ara. Yei nti, sɛ obi yare ntehyeewa a, ɛbɛyɛ papa sɛ ɔrenni mako pii.
3. Ɛtumi ma mmarima ahoɔden so te
Ɔbarima bi di mako pii a, ɛbɛtumi ama ne mmarimayɛ ho aba asɛm pa ara. Deɛ nti a ɛte saa ne sɛ, nhwehwɛmufoɔ kyerɛ sɛ, adeɛ bi wɔ mako mu a wɔfrɛ no piperine a ɛtumi sɛe mmarima ho nsuo. Wɔkyerɛ mu sɛ, sɛ saa piperine yi wura nipadua no mu a, ɛtumi kɔgyina faako a mmarima ho nsuo gu no na ɛma ahoɔden a ɛwɔ ɔbarima nsuo mu no gyene.
4. Ɛma wonya ɔhaw binom wɔ w’anom
Ɔhaw foforɔ a mako pii a yɛdi no de brɛ yɛn ne sɛ, ɛtumi sɛe nneɛma binom wɔ yɛn anom. Animdefoɔ kyerɛ sɛ, mako pii a yɛbɛdi no bɛtumi asɛe adeɛ a ɛma yɛte dɛ anaa nwononwono wɔ yɛ anom no. Yɛde yɛn anom a ɛbɛhyehye yɛn, nisuo a ɛtumi firi yɛn ani so ba berɛ a yɛredi mako a ano yɛ hye pa ara ne yɛn hwenem a ɛtumi sɔne nsuo no to nkyɛn a, yɛbɛtumi anya nsuansuansoɔ bɔne binom a ɛbɛtumi adane yɛn koankorɔ wɔ yɛn anom.
5. Ɛma yɛn menem hyehye yɛn
Nhwehwɛmufoɔ ada no adi sɛ, sɛ wogyina wo nan so di mako pii a, ɛbɛtumi ama wo menem ahyehye wo pa ara. Wɔkyerɛ sɛ, yei bɛtumi ama nnipa binom mpo menem ayɛ kuro. Wɔkyerɛ sɛ ɛtɔ da a, saa menem kuro yi ko nna fam koraa.
Wodi mako pii na w’anom hyehye wo na sɛ wonom nsuo a, ɛbɛtumi ama mako no ahyehye wo bebree. Mmom, deɛ wobɛtumi ayɛ ama mako no ano adwo ne sɛ wobɛdi kwadu anaa wobɛnom meleke.
Tɔfabɔ
Mako akɔyɛ te sɛ kokuromoti a yɛnsane ne ho mmɔ pɔ wɔ aduanenoa mu. Nanso, sɛ yɛanni no wɔ ɔkwan a ɛfata so na yɛdi pii ma no boro so a, ɛbɛtumi de ɔhaw bebree abrɛ yɛn nipadua no. Yei nti, ɛho hia pa ara sɛ yɛhwɛ sɛdeɛ yɛdi mako no yie.
