Finimfin na Atɔree Mantɔw mu nye Mfantseman ne mantɔw etsitsir. Mantɔw ebien nyinara no wɔ abakɔsɛm wɔ bɔɔlbɔ mu. Ɔnam do ma innkotum akasa afa Ghana bɔɔlbɔ abakɔsɛm ho ber a ennkɔbɔ hɔn edzin. Nkyɛ sɛ epɛ bɔɔlbɔfo etsitsir a wɔagye dzin da wɔ bɔɔlbɔ mu wɔ Ghana ha a, Finimfin na Atɔree Mantɔw mu bɔɔlbɔfo dzi mu akotsen papaapa. Ibotum akasa afa Robert Mensah, Michael Essien, John Paintsil, Samuel Inkoom, Alfred Duncun, George Owu dze ekesi bɔɔlbɔfo etsitsir a wɔabɛsen kɔ na hɔn a wɔreba nyinara do, nokwasɛm dɛ Mfantseman mantɔw ebien yinom ayɛ bi.
Bɔɔlbɔfo na bɔɔlɔbɔkuw etsitsir a Mfantseman mantɔw ebien yinom dze adom ɔman Ghana na wiadze nyinara kyerɛ mbɔdzem a mantɔw ebien yinom abɔ wɔ ɔman no no bɔɔlbɔ abakɔsɛm mu. Awerɛhosɛm nye dɛ, bɔɔlbɔkuw etsitsir ahorow a wɔwɔ mantɔw ebien no mu nyinara hɔn edzin apepa wɔ Ghana bɔɔlbɔkuw akansi mu.
Afe 2023-2024 Ghana bɔɔlbɔkuw akansi a ɔbɔkɔ do no, Mfantseman bɔɔlbɔkuw etsitsir Sekondi Hasaacas, Sekondi XI Wise, Elmina Sharks, Ebusua Dwarft na Swedru All Blacks hɔn mu kor mpo nnyi hɔ a wobesi bi. Aso wɔyɛ no dɛn na mpoano anhwea ho ayɛ no na ama mpoanofo yi?
Sɛ ehwɛ Sekunde Hasaacas, Sekunde XI Wise, Dena Sharks, Oguaa Ebusua Dwarft na Soadur All Blacks a, hɔn nyinara agye Ghana bɔɔlbɔkuw kɔɔpow no ebiasa (Sekunde Hasaacas- 1, Sekunde XI Wise-1, Dena Sharks-0, Oguaa Ebusua Dwarft-1 na Soadur All Blacks- 0). Iyi nyinara ekyir no, bɔɔlbɔkuw yinom agyegye nkɔɔpow ahorow binom aka ho a ɔma wɔwɔ dzin ankasankasa wɔ Ghana na Ebibir bɔɔlbɔkuw bɔɔlbɔ abakɔsɛm mu.
Obi ennhu dza osii; nsu anntɔ, ewia ammbɔ, bɔɔlbɔkuw ahorow yinom nyinara atsew ada koraa. Hɔn mu kor mpo nnyi hɔ a obenya kwan esi afe 2023-2024 Ghana bɔɔlbɔkuw akan no bi. Dza ɔyɛ awerɛhow wɔ ho nye dɛ, bɔɔlbɔkuw yinom per fow ba sor a, nna wɔasan apan. Binom so wɔ hɔ a wɔtsewee baa famu a wɔmmaa hɔn mu do bio na wogu do ara retsew kɔ ase a ɔnnyɛ asɛm papa mma Mfantseman na Ghana bɔɔlbɔ.
Afe 2010 na Sekunde XI Wise tsewee fii Ghana bɔɔlbɔkuw bɔɔlbɔ kɛse no mu. Fitsi dɛm aber no, wonntumii mmfowee mmbaa sor bio. Sekunde Hasaacas dze, afe 2016 na Wa All Stars hyɛɛ hɔn wɔ Esipɔn ma wɔtsewee baa famu a hɔn so wonntumii mmfowee mmbaa sor bio. Afe 2021 na Elmina Sharks so tsewee baa famu dɛmara. Dɛm afe no mu ara na Oguaa Ebusua Dwarft so tsewee baa famu. Soadur All Blacks dze, da a wɔtsewee baa famu no, ayew mpo efi ntanɛtse do. Aso wɔyɛ no dɛn?
Ber a dza esi yi ennya esi yi, otwar dɛ mantɔw ebien yi mu mpanyimfo na hɔn a wɔpɛ bɔɔl no yɛ biribi. Dɛ mbrɛ Kwaakye n’adze a ɔyɛ fɛw no ɔdze sika yɛ no, dɛmara na bɔɔlbɔ a ɔyɛ fɛw na ɔyɛ enyika so wɔdze sika yɛ. Mpɛn pii no, sikasɛm a ɔnnkɔ yie ntsi no, bɔɔlbɔkuw yinom hɔn ntotoe nnkɔ yie na ɔnam do ma ndzɛmba nnkɔ yie mma hɔn.
Ber edu dɛ mantɔw ebien yi mu mpanyimfo na hɔn a wɔpɛ bɔɔl nyinara ka bɔ mu yi sika dze sɔ bɔɔlbɔkuw yinom hɔn mfe ma wotum gyina hɔn anan do bio. Adze nye woara wodze. Sekunde Hasaacas, Sekunde XI Wise, Dena Sharks, Oguaa Ebusua Dwarft na Soadur All Blacks, hɛn dze ara nye no. Mfantseman mfrɛ yie!
