Mennkaa amamfo yaw o, yenyim dza osii wɔ Denkyira Ɔboase mfe kakra abɛsen kɔ. Dza osii nye dɛ, nsordaafo hɔn panyin a wɔfrɛ no Maxwell Mahama a ber no aban dze no too kurom hɔ dɛ ɔnhwɛ ma Galemsey nsɛnsɛm mbrɛ ase no, kuromamfo no hun no dɛ ɔyɛ ewi na wosiiw no abo kum no awerɛhowawerɛhow. Asɛm yi sii Esusow Aketseaba 29, 2017. Asɛm no ekyir no, nsordaafo gyee kurow no bɔɔ do boor no mu nyimpa binom ma dodowara guanee fii kurow no mu kɔbɔɔ hɔnho asese wɔ Denkyira no nkwaado. Mber kakra ekyir no, kurow no bɛdaan nsamamfokurow. Mprenpren yi dze, kurow no etum asan egyina ne nan do.
Annso hɔ ara. Yawda, Ayɛwoho 1, 2021 mu no, sen bi dzii ehin wɔ sohyial midia do. Sen no mu no, nsordaafo a wɔhyɛ hɔn edwuma mu ntar no tsewee sii Wa wɔ Etsifi Atɔree Mantɔw mu boor nyimpa pirapiraa pii a nna abɔdamfo, apemfo na mantɔw no mu mpanyimfo binom ka ho. Nkyerɛkyerɛmu a bɔhwɛɛadzefo dze too gua no nye dɛ, nsordaafo no kyerɛ a, sɔn no mu hɔ fo wiaa hɔnho nyimpa no fuon ntsi, nna wɔrohwehwɛ. Asɛm yi sii no, nsordaafo panyin a ɔwɔ Etsifi Atɔree Mantɔw mu hɔ no huaan nsordaafo yi a nna wɔyɛ baanan a wɔdze hɔnho gyee dza ɔtse dɛm no mu no hɔn dzibew do dɛ hɔn asotwee.
Bio, kor so sii wɔ Soame wɔ Esuantse Mantɔw mu. Ɔno dze, nna ɔnnyɛ nsordaafo na amamfo o; nsordaafo na aporisifo a. Asɛm yi sii Ɔbɛsɛ, 2021 mu. Dza ɔdze basabasayɛ yi bae no nye dɛ, aporisifo kyeer sordaanyi bi a oennsi abotar wɔ trafeke mu na otuu ne kaar ber a nna kandzea kɔkɔɔ no nnsɔe no too fiadze. Asɛm yi sii no, nsordaafo yi tsewee sii aporisifo no do wɔ Soame Aporisifo Asoɛe hɔ dɛ worikeyi hɔn dehyee no efi aporisifo no hɔn fiadze. Mbrɛ nsordaafo no tsewee sii aporisifo no do no, nna n’ano yɛ dzen ntsi, ɔmaa basabasayɛ sii. Anobaabaa no mu no na sordaanyi bi a nna ɔwɔ poristeehyen hɔ no frɛɛ nsordaafo kuw binom ma wɔbaa Aporisifo Asoɛe hɔ bɔboor aporisifo no. Aporisifo na Nsordaafo mpanyimfo bɔɔ mbɔdzen ma asomdwee bae ma asɛm no do twae. Iyi na binom a ɔkeka ho no na esi a ber yi munnkotum aka ho asɛm.
Nna nkyɛ Ghanafo nyim dɛ nsordaafo a wɔtsew si amamfo do ber a borɔn binom mu nyimpa epira hɔnho nyimpa anaa woeku hɔnho nyimpa no ase botwa, na mbom wɔafa asomdwee kwan do esiesie ntawantawa biara a obopuei ekyir no, naaso ammba no dɛm. Benada anapa, Ebɔw 7, 2023 mu no, Ahyaaman a ɔwɔ Nkran Kurowpɔn Mantɔw mu mba anntse asɛm pa. Ebɛn asɛm a? Nsordaafo a wɔkyerɛ a Ahyaamanfo eku hɔnho nyimpa baako no tsewee sii kurow no mu ahanamakye ndɔnebiasa bubuu hɔn mbobow twee mu nyimpa puei boor hɔn pirapiraa nkankan mbabun. Asɛm yi yɛ awerɛhowsɛm a nkorɔfo gu do rekyerɛ hɔn adwen wɔ hɔ.
Sɛ kurow bi mu mba dzi amambɔensɛm a ɔtse dɛm a, obiara nnsosɔw do, na mbom asɛm a dodowara bisa nye dɛ, aso oye dɛ nsordaafo dze mbra hyɛ hɔn nsamu bor apemfo, mbofra na hɔn a wonnyim dza esi ho hwee dze hyɛ hɔnho nyimpa a wopira no anaa woku no ananmu? Kyerɛ w’adwen wɔ hɛn sohyial midia prama ahorow no do.
