Eduaba yɛ adze bi a mfaso pii wɔ mu. Dɛm ntsi adatserfo bɔ ho dawur da baa dɛ yendzi bi. Eduaba a mereka ho asɛm yi, anamuna ka ho bi. Anamuna yɛ eduaba dɛɛdɛw bi a nsu ahyɛ mu ma. Hɔn a wofi Takoradze kɔ Mankɛsemu na hɔn a wofi Mankɛsemu kɔ Takoradze no dze, megye dzi dɛ wɔtaa hu beberee wɔ kwan nkyɛn. Ber a nkorɔfo ridzi anamuna eduaba no, wobu enyi gu n’aba no do na wodzi edziban no nko. Mbom, nhwehwɛmu a abɔtɔ gua nye dɛ mfaso pii na ɔwɔ n’aba no mu a otwar dɛ yɛhyɛ ase dzi. Dɛm Akyerɛw yi bɔdɔ mfaso ahorow a ɔwɔ mu no esukɔ.
Anamuna n’aba yɛ adze bi a dodowara a wodzi anamuna no hu no dɛ ɔyɛ akwansiwdze ma hɔn ber a woridzi eduaba no. Binom mpo dze, wonyae a nkyɛ aba biara nnyi anamuna eduaba no mu. Ɔnam do ma hɔn a wɔtse dɛm no mmpɛ aba nketsenketse yi enyim ahwɛ wɔ anamuna mu. Hɔn a wɔpɛ anamuna n’aba no, mpɛn pii no, wɔwe ka eduaba no ho. Binom so tɔ bo ara yiyi no nkorkor gu adze mu na sɛ wodzi edziban no wie a wɔawe aka ho. Binom dze, woyiyi no nkorkor gu adze mu beberee a, nna wɔdze egu adzedwow efir mu adwow anom. Aso mfaso pa bi wɔ do?
Edziban ho adatserfo ayɛ nhwehwɛmu afa anamuna n’aba ho. Wɔdze abɔto gua dɛ anamuna n’aba yɛ aba bi a edzibandur ahyɛ mu ma. Dɛm edzibandur yi nnyɛ edzibandur biara mbom edzibandur a ɔboa ma nyimpadua no nyin frɔmfrɔm. Adatserfo yinom kyerɛ a, proten, apɔwmudzen angoa na faeba ahyɛ mu ma. Aba no san wɔ edzibandur ahorow tse dɛ maginisɔm, arɔn na edzibandur a yenya no wɔ nduaba mu. Sɛ edze anamuna n’aba dze ka w’edziban ho a, ɔboa edzibandwowee wɔ nyimpadua no mu, ɔhyɛ w’ahoɔdzen mu kena na ɔboa ma wo honandua tɔ do fɛfɛɛfɛw. Ɔsan so ma wo tsirnhwi fuw fɛfɛɛfɛw so.
Yɛmfa edzibandur a aba no dze ma nyimpadua no nto nkyɛn, ɔyɛ adze bi a ne ndzii yɛ dɛw papaapa. Sɛ awe aborɔfonkatse da a, ne dɛw no bɛka dɛ ɔno bi ara pɛr. Binom tum yiyi no nkorkor na wɔhata ma ɔhow a wɔatoto. Sɛ wɔtoto a, wotum dze gu hɔn salade anaa yogɔto do dze dzi no akɔndɔakɔndɔ. Binom tum yam anamanu n’aba no yɛ no isiam dze dzi hɔn edziban ahorow. Wɔhata ma ɔhow wie a, nna wɔayam no isiam dze ayɛ edziban ahorow. Dɛ mbrɛ adatserfo ada mfaso a ɔwɔ do edzi no, edzibanyɛfo ahyɛ ase dze reyɛ edziban ahorow. Binom mpo ahyɛ ase dze edziban akadze ahorow ka ho dze yɛ nsafenefenem nom no wɔ fie.
Anamuna eduaba no dze, edziban ho adatserfo kyerɛ dɛ ne fa biara nnyi hɔ a otwar dɛ yɛtow kyen. Aba a nna nkyɛ dodowara mmpɛ n’asɛm wɔ anamuna eduaba no mu no abɛyɛ dɛ bobaa a dansifo atow akyen ma abɛdan bobaa tsitsir. Ber a ehu mfaso a ɔwɔ do no, otwar dɛ ehyɛ ase pɛ bi we nya do mfaso. We bi na ɔnyɛ woho edur. We bi na oye.
