Okunyin Kwegyir Aggrey dze asɛm yi too gua wɔ ne kasakyerɛ mu wɔ South Africa dɛ, “…Emma ɔbaa nwomasua a, nna edze ɔmanmu”. Iyi egyina dɛ okunyin yi ne kasaa anaa n’adwenkyerɛ bi kɛkɛ. Nwomasuafo, ndwumakuw na aman hyɛɛ ase dzii ho dwuma na wogu do so ridzi ho dwuma araa dɛ abasiaba no nnkɛtsena fie ber no nua abanyimbasiaba no rokɔ skuul dɛ mbrɛ nkyɛ nkan no ɔtse no.
Ebɛnadze akɛfa asɛm a hɛn nyinara yenyim dada yi aba bio?
Ahyɛse Skuul Abɔdzindze Nsɔhwɛ (BECE) a afe biara Mbofra Nsɔwdo Skuul esuafo a wɔwɔ mangow esia anaa gyinapɛn akron kyerɛw dze pon hɔnho wɔ dɛm nwomasua mu gyinabew no no mu dza wɔkyerɛw no afe 2023 mu na ɔdze nkɔmbɔdzi aba. Ne nyinara nye dɛ afe 2023 mu BECE no ne nkyerɛwee mu no, mbaa dɔɔ so wɔ esuafo no mu sen mbarimba. Afe 2023 mu, esuafo dodow a wɔrekyerɛw BEC nsɔhwɛ no nyina yɛ 600,714. Mbaa a wɔwɔ iyi mu yɛ 300,391, na mbarimba a wɔwɔ mu so yɛ 300,323. Nna tserɛ, mbaa no hɔn dodow bor mbarimba no dodow do 68. Iyi nntɔ dɛ osi.
Ampa, dodow a ɔbor do nnsɔ enyi wɔ enyiwa do dze, yɛwɔ kasa bi a yɛka dɛ ketsewa biara nnsuar. Yɛkɔ mu yie a, yebohu dɛ mpontu na nkankɔ beberee aba yie. Mfe kakra a abɛsen no, nna nkyɛ ɔyɛ dzen mpo dɛ yebenya mbanyin na mbaa hɔn dodow dɛ wogyina pɛr. Mpɛn pii no, dza yehu na yɛtse nye dɛ mbanyin no dodow dɔɔ so sen mbaa no. Afe 2022 mu mpo no, nna mbarimba a wɔwɔ esuafo no mu no hɔn dodow bor mbaa no 1,710. Yɛhwɛ no dɛm a, nna tserɛ nsesa aba mu araa yie.
Iyi so ma yehu dɛ mbasiaba nwomasua etu mpon araa yie. Nnyɛ dɛm nko mpo: mbaa dwumadzi na ahokeka wɔ nwomasua mu wɔ Ghana na wiadze nyinara no akɔ enyim araa yie. Ndɛ yi, yɛwɔ nwomasua mu esuafo dzibew tsitsir binom na skuul ahorow nhwɛdo dzibew etsitsir pii a mbaa na wɔdeda ano. Afe 2023 mu ambatow ɔkɔr do wɔ KNUST esuapɔn mu a wɔdze riyi esuafo no hɔn baanodzinyi no, ɔbaa na odzii konyim. Na ɔman no n’esuapɔn kɛse a dodowara nyim dzin a wɔdze frɛ no dɛ Legon, ɔbaa, Ɔbemfo Nana Aba Amfo, na ɔda ano dɛ esuapɔn no nohwɛdofo panyin a iyi nye ber a odzi kan a ɔbaa refa dɛm dzibew wɔ esuapɔn Legon mu.
Ɔwɔ mu dɛ nkankɔ aba anamɔntu no mu dze, beberee so na wobotum ayɛ aka dza yeruhu ho. Na mma ɔnnyɛ dɛ yerinya hɔn dodow no ara kɛkɛ, mbom no ɔwɔ dɛ yehu dɛ mpontu so aba hɔn adzesua nye nwomasua nankasa no mu. Ɔno na ɔbɛkyerɛ daakye yɛrohwɛ enyim kwan no ne gyinabew.
