Yedzidzi ama yeenya honam dze enyin, ma yeenya ahoɔdzen dze ayɛ edwuma. Ntsi onnye dɛ yedzidzi pii. Edzidzintrudu muo, osiandɛ ɔma yarba. Nom nsu pii anapa biara ansaana edzidzi; na mbom mma nnom nsu pii ber a iridzidzi.
Aber biara hohor wo nsa ho ansaana edzidzi, amma aammfa yarba bɔn bi ammfora edziban no mu annkɔ wo yamu. Idzidzi ewiaber na eyɛ na ɔbɛyɛ a, da bɛyɛ dɔnhwerfa. Mma nndzidzi basabasa. Tweɔn ma w’edzidzi ber nso ana edzidzi.
Sɛ idzidzi ewiaber wie a, ma ber ngu mu kakra ansaana ada. Eda a, buebue wo ntokura , na mma mmfa tam nnkata wo tsir do. Fa dapɛn mu dakor si hɔ a edze bohor wo ndzɛmba. Ehor wie a, fa dadze hyew tow do ma mbowa bɔn biara a wɔwɔ mu nwuwu.
Mma nngye nwansema na nkura enyi wɔ fie. Wɔyɛ amambɔefo a wɔdze yarba ba. Ntonton so dɛmara; hɔn na wɔdze yarba a wɔfrɛ no papu (malaria) na. Mma mmfa ndaka na ndzɛma pii nnsisi dan a eda mu mu. Osisi mu a,innya kwan mmprapra wo dan mu yie, ntsi ntafrɛw na mbowabambowaba nya kwan kosumasuma ekyir.
Nsu biara a ebɔnom no dzi kan noa, na bi a nna mfa mbowaba wɔ mu. Ma wo dan mu , w’asado, wo paado na wo mfikyir nyɛ wansawansa.
