Ɔnnkyɛree biara na Nana Ama Mcbrown no dwuma a odzi no wɔ UTV memenda biara no ɔtoo nsa frɛɛ Valentina Nana Agyiewaa a dodowara frɛ no Afia Schwarzenegger dɛ ɔmmbɛka n’ampamfo ho ma wɔnntwetwe nkɔmbɔ wɔ dwumadzi no do. Nkɔmbɔtwetwe no mu no na wobisaa Afia dɛ, Ghanamba enya no ntsee dɛ, ɔno Afia no nye Chairman Wontumi atwe mpona pɛn. Ma mpo sɛ ɔnye no nya mpa mu nkitahodzi a, nna Chairman Wonntumi reyiyi mframa bɔn.
Dɛm nkɔmbɔ twetwe yi maa Afia guu Chairman n’enyim ase papaapa ma ɔsanee bɔɔ dua dze asɛm no kɛdan Nogokpo abosom dɛ wondzi n’asɛm mma no. Afia san so dze n’asɛm kɔr Mbranyimfo Maurice Ampaw do a nna ɔnnyɛ agor koraa.
Ɔnam dɛm enyimguase a Afia dze guu Chairman Wonntumi no ntsi no, ɔdze asɛm yi kɛdan Asɛndzibea kɛse wɔ Ayɛwoho 14 , 2022 dɛ wɔnye Afia na n’apamfo ntwe no tann. Ɔnnyɛ Afia nko na ɔbɔɔ no sombo na mbom Fadda Dickson a ɔyɛ nhwɛdofo ma UTV edwumakuw no,Nana Ama Mcbrown a ɔyɛ guamutsenanyi ma united show bizz dwumadzi no,Mr Logic na Kwame Asare Obeng a dodow ara frɛ no A plus. Dɛm nkorɔfo yi nyinara kɔɔto no abɔ hɔn kaw ₵60,000 dɛ obiara ntua na nyia oenntua dɛm sika yi bɛda fiadze bosom kor. Afia Schwarzenegger dze , kɔɔto no ebua no fɔ dɛ ɔnda fiadze nda du.
