Mbaa yɛ abɔdze nyinara kaekyir a wɔyɛ soronko koraa. Hɔn mbɔdzembɔ wɔ asetsena yi mu dze, wɔtow no abaw a onnhyia. Nkan no, nna mbaa hɔn egyapadze nyinara n’abɔse nye gyaadze. Dza nna nkorɔfo tɔ ka nye dɛ, “Mbaa dze nye gyaadze na mbanyin dze nye skuul”. Dɛm ntsi, nna mbaa nnya kwan nnkɔ skuul kantom wɔakɔ ekodu ekyir. Ndɛ mber yi dze, ndzɛmba asesa. Mbaa afa hɔn atam apapa efura ma dzibew biara no, wotum dzi bi. Nna tserɛ, dza banyin tum yɛ no, ɔbaa tum yɛ yɛ no yie. Mbaa a wotum yɛ yɛ no yie no, bi nye Sarah Seyram Arhinful a merebɛka no ho asɛm yi.
Wɔwoo Sarah Seyram Arhinful wɔ Kpando a ɔwɔ Firaw Mantɔw mu. Ɔyɛ ɔbaa bi a ɔhyɛɛ no skuulkɔ ase wɔ Sonrise Christian Skuul a ɔwɔ Hɔhɔe. Owiee Mbofra Nsɔwdo Skuul no, ɔtoaa do wɔ OLA Mbaa Mpanyin Nsɔwdo Skuul a ɔwɔ Ho wɔ Firaw Mantɔw mu hɔ ara. Owiee OLA no, ɔtoaa do kɔr Simpa Suapɔn no nkorbata a wɔhwɛ Ghana Kasahorow do a ɔwɔ Edwumako afe 2018. Hɔ no, okosuaa Awona na Borɔfo kasa. Ɔammfa n’adzesua enndzi agor koraa. Ɔnam do ma ɔayɛ adze bi a ne saso bi mmbaa da wɔ Simpa Suapɔn no n’abakɔsɛm mu. Dza ɔka do yi bɛkyerɛkyerɛ dza ɔayɛ no mu.
Suapɔn skuulkɔ nntse dɛ skuul nkaa no. Ɔyɛ skuul bi a, wɔwɔ kwan soronko a wɔfa do hyehyɛ aba a esuafo nya no, na sɛ wowie skuul a wɔaka ne nyinara abɔ mu. Borɔfo kasa mu no, wotwa no sin ka no GPA. Ɔno nye dɛ, aba biara a ibotwa no wɔ nsɔhwɛ ahorow biara mu no, wɔwɔ akyerɛwamba a wɔdze gyina hɔ ma no. Sɛ itwa eduowɔtwe dze kesi ɔha a, wɔma wo ‘A’. Sɛ itum twa eduosoun enum dze kesi eduosoun akron a, ɔno so wɔma wo B+. Wɔahyehyɛ no dɛmara dze rokɔ. Dza Sarah Seyram Arhinful ayɛ a ɔyɛ nwanwa a obiara robɔ ne dzin no nye dɛ, mfe anan a ɔdze kɔr suapɔn no, ɔannyɛ adze koraa no, nnyɛ ne ‘A’. Iyi kyerɛ dɛ, nsɔhwɛ bɛyɛ eduonum a ɔkyerɛwee no, otwaa eduowɔtwe dze rokɔ ɔha nko a ɔyɛ adze a ɔnntaa nnsi.
Ɔbaa no dɛm no, ber a nna hɔn a wowiee suapɔn afe 2022 reyɛ hɔn nhyiamu no, mpanyimfo bɔɔ n’abaw do soronko. Nhyiamu yi kɔr do Wukuda Ebɔw 29, 2023 wɔ suapɔn no ne nhyiamubea kɛse a wɔfrɛ no Jophus Anamoah Mensah Nhyiamubea. Mpanyimfo maa no Ghana sika sidi apem (¢1000). Sikasɛm no nda nkyɛn; ɔno nye suanyi a odzi kan a oetum ayɛ adze a ɔtse dɛm. Ɔyɛ ɔbaa, na osuaa Ghana Kasahorow (Awona kasa) no, ɔma ɔyɛ enyika a otwar dɛ yɛnye no bɔ mu hiahia no wɔ dza ɔayɛ no ho.
Sarah yɛ ɔbaa, oetum ayɛ a, ɔwo so botum ayɛ bi. Bio, ɔyɛɛ Ghana Kasahorow wɔ skuul, mekyerɛ Awona kasa no. Ɔamma biribiara emmbu n’abaw mu wɔ Ghana Kasahorow no sua ho na oetum etwa etwa no yie a, otwar dɛ yɛbɔ n’abaw do. Dɛ mbrɛ Bolingo Consultfo enyi wɔ Ebibirman kasa no nsuae ho, na Sarah Seyram Arhinful etum ayɛ dza ɔtse dɛm no, migyina hɔn ananmu bɔ n’abaw do kɛse kɛse na meka dɛ Nyame nhyira no pii.
