Bɔɔlbɔ wiadze no anntse asɛm pa Dwowda anapa Ɔbɛsɛ 10, 2022. Awerɛhowsɛm a bɔɔlbɔ wiadze atse no nye dɛ, adatserfo ahyɛ Zambia na Brighton na Hove Albion bɔɔlbɔnyi aberantsɛ a wɔfrɛ no Enock Nwepu dɛ ɔmfa no bɔɔlbɔ mbra ewiei ɔnam akoma yarba a ɔwɔ n’ebusua mu a ɔno so oenya ne kyɛfa no.
Enock Nwepu edzi mfe eduonu anan (24) pɛr. Oesi akan eduonu ebiasa (23) atow atsena nsia ama ne man Zambia. Oesi akan ama bɔɔlbɔkuw anan. Iyinom nye NAPSA Stars, Kafue Celtic, Red Bull Salzburg a ɔwɔ Austria na Brighton na Hove Albion a ɔwɔ Ngyiresi aborokyirman mu. Bɔɔlbɔkuw afamu no, oesi akan nkorkor ɔha eduonu awɔtwe (128) na ɔato atsena duakron (19).
Nhwehwɛmu kakra a akannews.com ayɛ kyerɛ a, Fankwa 20, 2022 na Enock kɔree dɛ orikesi akan ama ne man Zambia. Odurii no, nna no ho nnyɛ no dzen ntsi wɔgyee no too ayarsabea. Mbrɛ nna yarba no tse no, Zambia adatserfo maa wɔdze no kɔr Ngyiresi aborokyirman dɛ wɔmboa nyɛ nhwehwɛmu. Ɔbɛsɛ 10 anapa na no bɔɔlbɔkuw Brighton Na Hove Albion dze bɔtoo gua dɛ: “Adatserfo ahyɛ Enock Nwepu dɛ ɔmfa no bɔɔlbɔ mbra ewiei ɔnam ebusua mu akoma yarba a ɔno so oenya ne kyɛfa no”.
Asɛm yi bɔtɔɔ gua no, wiadze n’afɛndzanan nyinara dze hɔn dzenhyɛ nsɛm ama Enock Nwepu. Bɔɔlbɔkuw akɛse, bɔɔlbɔfo, bɔɔlbɔ mpanyimfo na Enock Nwepu n’adɔfo nyinara dze hɔn dzenhyɛ nsɛm ama Enock Nwepu. Akannews.com edwumayɛfo nyinara dze hɛn dzenhyɛ nsɛm ma Enock Nwepu. Ɔnhyɛ dzen.
