Yɛtaa ka dɛ, “Adze anaa asɛm biara nnyi wiadze yi mu a bi nnsii da” dze, eso asɛm bi wɔ hɔ a etse a, ɔyɛ nwanwa na ɔgye adwendwen. Ɔtɔ fa bi a, nsɛm a yɛtsetse no, bi tɔ son do mpo a, otum ku no. Mpɛn pii no, yɛtse dɛm nsɛm no bi wɔ ekyirekyir na yɛtse bi so wɔ hɛnankasa hɛn nan ho. Dɛm nsɛm a yɛtaa tse no wɔ ekyirekyir no, bi nye Jean-Pierre Adams n’asɛm a merebɛka ho asɛm wɔ akyerɛw yi mu no.
Wɔwoo Jean-Pierre Adams wɔ Senegalman no kurowpɔn Dakar mu. Mbrɛ Frɛnkyeman no na Ebibir amanaman a odzii hɔn do hɔn nkitaho tse no ntsi, ber a odzii mfe du (10) no, ne nanabaa nye no tuu kwan kɔr Frɛnkyeman no kurow a wɔfrɛ mo Montargis. Ne nana ammbɔ no abor; ɔdze no kɔtoo Roman skuul a wɔfrɛ no “Saint-Louis de Montargis”. Annkyɛr biara na Frɛnkye awarfo bi bɛfaa no kɛtsenaa hɔn nkyɛn dɛ hɔn ba.
Ber a nna Jean-Pierre Adams rokɔ skuul nyinara no, Frɛnkye awarfo no rohwɛ no mpo no, bibinyi a n’enyi ber edwumadzen no, nna noara bɔ noho mbɔdzen yɛ edwuma nkakrankakra nya sika hyɛ no ho. Nna ɔyɛ edwuma wɔ rɔba edwumakuw bi mu wɔ Montargis. Ber a ɔreyɛ edwuma na ɔrokɔ skuul nyinara no na ɔhyɛɛ no bɔɔlbɔ ase. Osii akan maa bɔɔlbɔkuw ahorow a nna wɔwɔ ne mansin mu hɔ no nkakrankakra kesi dɛ ɔgyee dzin ma Frɛnkye bɔɔlbɔkuw akɛse hyɛɛ ase dɛ wɔpɛ no ma oebesi akan ama hɔn.
Jean-Pierre Adams gyee dzin wɔ bɔɔlbɔ mu no, osii akan maa Frɛnkye bɔɔlbɔkuw ahorow. Iyinom mu bi nye Nimes, OGC NICE na Paris Saint-Germain. Ɔsan so sii akan maa Frɛnkyeman no so. No bɔɔlbɔ akwantu mu no, oenntum anngye kɔɔpow tsitsir biara ennsi ne nan do dze, eso otumii bɔɔ no ho mbɔdzen yie. Akwanya a ne nsa kae sii akan maa Frɛnkyeman no mpo kyerɛ no mbɔdzembɔ wɔ bɔɔlbɔ mu.
Ber a nna ɔtse ase no, ɔwaree Frɛnkye borɔnyi bi. Ne dzin nye Bernadette. Afe 1969 na wɔwaree. Wɔwoo mbabanyin beenu; Laurent Adams na Frédéric Adams. Ber a Jean-Pierre Adams dze no bɔɔlbɔ akwantu no kɔr ewiei no, afe kor ekyir wɔ Ebɔw 17, 1982 mu no, nna ne ntsin mu nnyɛ no dzen ntsi ɔkɔr asopitsi wɔ Édouard Herriot Asopitsi a ɔwɔ Lyon dɛ ɔrokɔhwehwɛ mu na ɔasa no honandua mu pira biara dɛ mbrɛ bɔɔlbɔfo yɛ no. Ne tsir annyɛ yie; ber no, nna adatserfo dodowara nnyi asopitsi hɔ ɔnam hɔn akatua ho nsɛnsɛm a nna ɔnnkɔ yie no ntsi. Dɛm ntsi, datser kor a nna ber no ɔwɔ edwuma mu no nye datsernyi a nna ber no ogu do ara regye ntsetsee no hwɛɛ no. Wɔbotaa no nda edur a nna nkyɛ ɔwɔ dɛ dɔnhwer kakra ekyir no, n’enyi do tsetsew do. Iyi na Fofie annto Ata ma dɔnhwer kumaa kɛdaan mfe eduonu akron (39) no.
Afe 1990 mu no, Frɛnkye asɛndzibea bi tsenaa asɛm no do. Wɔbɔɔ datsernyi no na no suanyi no kaw $815 na woyii hɔn edzi bosoom kor pɛr fii edwuma mu. Ber a Owura Adams tɔr akɔtɔmborɔnsa no, ne yer Bernadette no nkorɔfo dodowara na wopiapiaa n’etsikɔ dɛ nkyɛ ɔntse ase ma wɔmbota no kun ewudur ma onwu korakoraa na onya n’ahotɔ eso ɔyer pa ammpen do da! Ɔtsenaa no kun ho soom no araa kɛpem Fankwa 6, 2021 a onyaa ne beebi kɔree. Odzii mfe eduosuon ebiasa (73) ansaana oruwu.
Nokwasɛm dɛ yɛtse nsɛm a ɔyɛ hu dze, eso Owura Jean-Pierre Adams n’asɛm yi yɛ awerɛhow dodow. Bɛpem ndɛ, ne yer da ho ara tse ase a ɔreper biara dɛ dza ɔsɛ biara a asopitsi no a ɔmaa no kun faa ɔhaw a ɔtse dɛm mu na dza ɔno so faa mu nyinara no, Frɛnkye aban no bɛyɛ ho biribi pa ama no. Nhwehwɛmu kyerɛ a, Frɛnkye aban no da ho ara hwɛ Owura Adams ne yer na ne mba no.
