Ɔyɛ wikipediafo ahohoahoa dɛ wɔagye Fante Wikipedia ato mu. Mfantse yɛ Kwa kasa a wɔka no wɔ Ghana nkankan Mfinimfin na Atɔree Mantɔw mu. Hɔn a wɔka kasa no nye Mfantsefo. Ber a wikipediafo agye kasa no ato mu no, Mfantsefo wɔ ho kwan dɛ wobenya akenkansɛm biara a Fante Wikipediafo akyerɛw ato hɔn prama do no wɔ Mfantse kasa mu akenkan.
Sɛ yɛka Fante Wikipedia a, ɔyɛ Wikipedia a wɔhyɛ Wikimedia ase hɔn nsaanondwuma no mu bi. Mpanyimfo a wɔda dwumadzi yi ano nye Owura Robert Jamal, Ebenezer Kobinah Offen, Leonard Dan Nketsia na Suzie Onomah. Edwumakuw yi n’apɛdze ara nye dɛ ɔbɔboa ma biribiara a ebɔhwehwɛ no wɔ Google no, wo nsa bɛka ne Mfantse dze pɛpɛɛpɛr a ɔwɔ Wikipedia do tse dɛ mbrɛ Borɔfo dze no tse no. Afe 2021 na dwumadzi yi bɔbɔɔ adze.
Fante Wikipedia yɛ adze bi a ankorankor binom a wɔwɔ ntsetsee wɔ abaɛfor mfir ho, Mfantse akyerɛkyerɛfo a wokitsa abɔdzin wɔ Mfantse kasa no nsuae mu, esuafo ahorow na “Wikimedia Foundation” kaa bɔɔ mu yɛe. Wikimedia Foundationfo na wɔhwɛ Wikipedia edwumakuw ahorow no nyinara do wɔ Ghana na wiadze n’afɛndzeanan nyinara mu. Dwumadzi soronko yi baa mpanyimfo tsir mu ber a Asante Twi Wikipedia dze no bɔbɔɔ adze no. Mpanyimfo hunii dɛ, Asante Twi nye Mfantse na wɔtafer bɔ mu wɔ Akan kasa no ne gyaadze. Dɛm ntsi, wɔdwenee hunii dɛ otwar dɛ sɛ Asante Twi wɔ bi a, Mfantse so nya ne dze.
Seseiara dze, Fante Wikipedia prama no wɔ nsɛm a no dodow bor apem (1000) a Mfantse akyerɛwfo etsintsim wɔ do. Dɛm nsɛm yi mu bi fa amanyɛfo ho, bɔɔlbɔfo ho, ndwontowfo, sentwafo ho na dzin ahorow ho. Ɔyɛ Fante Wikipediafo hɔn enyidoadzehu dɛ wɔbɛkyerɛw nsɛm pii egu prama no do ma prama no ne ntsin ewurawura asaase mu yie na aasom bo ama Mfantsefo nyinara.
Fante Wikipedia a wikipediafo agye ato mu no yɛ dase ma mfaso a ɔwɔ bataboa ho, na ɔda bo a kasahorow som no so edzi. Seseiara dze, Mfantsefo nyinara wɔ ho kwan dɛ wɔbɛkenkan Wikipedia do nsɛm wɔ hɔnankasa hɔn kasaa mu. Sɛ eyɛ Mfantsenyi na w’enyi gye Mfantse akenkan ho dze a, nna ɔno yɛ ntsɛm kɛkenkan bi. Fante Wikipedia – Nwomapɔn ma obiara.
