Awofo hɔn asɛdze wɔ mbofra ntsetsee mu.
Mba yɛ akyɛdze a Twerammpɔn Nyankopɔn dze doom nyimpa. Mba ho hia wɔ nyimpa biara n’asetsena mu. Nnyɛ dɛ nyimpa bɔwo ara na ohia mbom ntsetsee pa a awofo dze bɛma hɔn mba na ohia kɛse. Akanfo hɛn amambra mu nu, ba ne ntsetsee nngyina nyimpa kor pɛr no do anaa nyimpa a ɔwo ba no nko do na mbom ebusuamu no nyinara. Ɔyɛ Wɔfa, Nana, Agya, na, na nyimpa biara a ɔwɔ fibobow no mu no nyinara asɛdze. Ndɛ dze nkorɔfo dɛ, obi nntsea obi ne ba. Sɛ Obi tsea abofra bi mpo wɔ ebusua no mu a , otum dze manso ba hɔn ntamu. Aso iyi bɔboa mbofra ntsetsee pa akɔ do a? Aso yɛroboa hɛn mba no hɔn daakye a? Asodzi pii na ɔda awofo do sɛ ɔba no hɔn mba afa mu a. Wɔma yɛnhwɛ ndzɛmba a ɔsɛ dɛ awofo yɛ dze boa mbofra hɔn ntsetsee anaa awofo hɔn asɛdze wɔ mbofra ntsetsee mu.
Odzi kan, ohia dɛ awofo bɛma hɔn mba ehu hɔn asɛdze dɛ mbofra wɔ hɔn mbafobermu ansaana woenyin . Awofo binom dze hɔn nsa fɔrfɔɔr hɔn mba ho a wɔnnkyerɛ hɔn dza ɔsɛ dɛ wɔyɛ na dza onnyi dɛ wɔyɛ. Otwar dɛ awofo dze hɔn mba tsena hɔ kyerɛkyerɛ hɔn ma wohu hia a ohia dɛ wobohu hɔn asɛdze dɛ mbofra na iyi bɛma woenya no ho ntsease amma woeetum ayɛ hɔn asɛdze dɛ mbrɛ ɔsɛ fata
Dza ohia bio a ɔsɛdɛ awofo yɛ dze boa mbofra hɔn ntsetsee nye dɛ wɔbɔbɔ mbɔdzen ayɛ mbofra hɔn ehiadze ama hɔn. Ɔyɛ ɔbaatan biara n’asɛdze dɛ ɔbɛma ne ba ndzɛmba bi tse dɛ edziban, ntar, mpaboa, bea a ɔbɛda na mpo dɛ wɔbɔhwɛ hɔn banbɔ ho nsɛm yie. Abaatanyɛ yɛ asodzi kɛse na otwar dɛ obiara hwɛ ne ba a ɔdze no aba wiadze. Ghana hɛn mbrapɔn no mpo ada no edzi dɛ, otwar dɛ baatan biara ma ne mba nsa ka hɔn ehiadze na nyiaa ɔannyɛ iyi no, wotum dze ne kegyina mbra enyim ma aban twe n’aso. Sɛ awofo amma hɔn mbofra enya hɔn ehiadze a, ɔma mbofra no fa abrabɔ bɔn mu dɛ mbrɛ obenya n’ehiadze. Iyi nnkyerɛ abatsetse papa osiandɛ ɔsɛɛ mbofra hɔn abrabɔ.Dɛ awofo bɛma hɔn mba hɔn ehiadze no boa ma abatsetse kɔ do yie.
Bio, wɔ mbofra ntsetsee mu no, ɔwɔ dɛ awofo bɔ mbɔdzen araa kyerɛ hɔn mba ɔdɔ. Ɔdɔ yɛ adze a no ho hia wɔ abaatanyɛ mu. Ɔsɛ dɛ baatan biara dɔ ne ba na ɔnye abofra no nya nyɛnkofa bi a ɔbɛma abofra no enya akwangya no etum nye n’awofo akyɛ ne haw anaa no mpontu ho nsɛm. Abatsetse mu no, ɔsɛ dɛ awofo ma hɔn mba aso. Ohia dɛ aber biara no, awofo betsie hɔn mba ama woehu beebi a wɔtɔ sin wɔ na oegyina do ama hɔn nsɔwano pa a ɔbɔboa hɔn daakye.
Otwa tun, nwomasua yɛ akyɛdze a awofo botum dze ama hɔn mba a obiara nnkotum agye efi hɔn nsamu. Nwomasua ho hia ma nyimpa biara a yennkotum eyi mbofra efi mu. Mbofra a yɛretsetse hɔn yi nye ɔman no ne daakye.Bisa dɛ sɛ yɛamma mbofra yi ntsetsee pa a, ɔman no ne daakye a yɛreka ho asɛm no wɔ hen. Iyi ntsi na otwar dɛ awofo dze yɛ hɔn enyi ho adze dɛ wɔbɔbɔ mbɔdzen ama hɔn mba akwangya ma woetum esua ndzeyɛɛ pa a ɔdze mfaso pa bɛbrɛ ebusua, awofo na ɔman mu no nyinara. Sɛ ekɔ hɛn nwomasuabea ahorow no mu a, yɛwɔ akyerɛkyerɛfo a wɔakwadar wɔ kwan a wɔdze tsetse mba ho anaa wɔwɔ ho nyimdzee mapa.
Iyinom nyinara boa mbofra ma wonya ntsetse pa osiandɛ awofo nko nnkotum edzi dwuma no. Mpanyimfo na wobu hɔn bɛ bi dɛ, “Wonso mu wonso mu, wɔnye nyimpa”. Iyi da no edzi pefee dɛ abatsetse nnyɛ awofo nko edwuma mbom obiara tum tu no ho hɔ dze boa ama woedzi mu.
Awofo mbɔ hɔn ho mbɔdzen nyɛ dza wobotum biara mfa mboa mbofra hɔn ntsetsee na iyi dze mfaso pa bɛbrɛ ebusua na ɔman no nyinara.
