Ogyahyehyew yɛ adze bi a abɛgye ehin wɔ ɔman Ghana na wiadze n’afɛnandze nyinara mu. Ɔtaa si ber to ber. Ɔnam iyi do ma yetum hwer nyimpa, sika na egyapadze pii wɔ afe biara mu. Da kor, ndaawɔtwe anaa bosoom biara nnyi hɔ a yɛnntse gyahyehyew ho asɛm. Sɛ yɛhwɛ dza osisi ber nyinara a, yetum hu dɛ kɔ ara na gyahyehyew ho nsɛm gu do rokɔ sor na aso yebisa hɛnho dɛ, “Ebɛnadze ntsi na ɔnam do ma iyi si?”
Ogya hyehyew a ɔtaa si ber to ber no dze hu na suro ahyɛ faara hɔn daa daa asetsena mu. Dɛm nsɛm yi a merekyerɛw yi bɛkasa afa ho na kwan ahorow a ɔnam do ma ɔba.
Obi bebisa dɛ, “Ebɛnadze mpo nye gyahyehyew?” Sɛ yɛka gyahyehyew a, dza yɛrekyerɛ araa nye dɛ gya a ano yɛdzen a ɔtɔ beebi tse dɛ fie, edwuma mu, skuul, guadzibea, haban mu na mbeambea ahorow pii a ɔkeka ho a ɔnam do ma yetum hwer tsitsir nyimpa na egyapadze ahorow pii. Sɛ iyi si a, ɔdze ɔhaw na kɛdaannda na ɔdze brɛ ankorankor na ɔman. Dɛm siantsir yi ntsi, onnyi dɛ yɛdze gyahyehyew ho nsɛm dzi agor. Sɛ yɛhwɛ kwan a gyahyehyew nam do ba a, yetum gyina do do nya ne nkyekyɛmu. Bi nye efiefie mu dze, dza osi ndwumakuw ahorow mu, dza ɔnam hɛn anaa kaar do ba, dza enyinamkandzea dze ba, dza osi wɔ haban mu na pii a ɔkeka ho. Mpanyimfo na wobu hɔn bɛ bi dɛ, “Wisiw biara nnyi hɔ a orupun a ogya biara nnhyɛ ase” na dɛm ara so na “Sɛ biribi annkaka mpapa a, nkyɛ mpapa nnkɛyɛ kyerɛdɛdɛɛdɛ”. Iyi da no edzi pefee dɛ biribiara nnsi kwa. Ansaana gyahyehyew besi no, na ɔnam siantsir bi do. Dza odzidzi do a merebɛkasa afa ho yi yɛ akwan horow a ɔnam do ma gyahyehyew tum ba no mu bi.
Dza odzikan a mpɛn pii no ɔdze gyahyehyew ba nye enyinam kandzea. Enyinamkandzea na ɔtaa dze gyahyehyew ba papaapa na kwan ahorow pii do na ɔfa do si. Dumsɔ dumsɔ pii dze ogyahyehyew ba. Sɛ hɔn a wɔma hɛn enyinamkandzea nya ɔhaw wɔ hɔn dwumadzi mu anaa mpo hɔn mfir ho na sɛ wɔreyɛ a, mpɛn pii no, wɔmmbɔ nkaa biara ma nkorɔfo nnda hɔnho do nndundum hɔn mfir. Wogu do reyɛ nsiesie no, kandzea no tum dum sɔ. Sɛ iyi kɔ do kyɛr a, gya tum fa ahoma no mu kopue sɔkɛtse no mu ma gya tɔ mu. Aso bisa woho dɛ sɛ nyimpa no nnyi fie a, na ɔkyerɛ dɛ gya no araa na ɔbɔtɔ fie hɔ anaa edwuma mu hɔ asɛɛ ndzɛmba a yɛapɛ no mber pii egu hɔ.
Bio, Ghanafo nntaa nsiesie ahoma a yɛdze twe enyinamkandzea dze kɔ mbeambea ahorow pii yie. Ɔtɔ fa bi a, ɔno so tum dze gyahyehyew ba. Ɔnam dɛ ahoma no egu do akyɛr na n’ahoɔdzen akɔ famu ntsi, sɛ ɔwɔ mu araa, otum pepa gya na sɛ fie bi bɛn dɛm enyinamkandzea dua no ase a, gya no bi tum tɔ hɔ ma ɔhyew.
Ɔnnso hɔ ara, ahoma a yɛdze twe enyinamkandzea dze kɔ hɛn efiefie mu, ndwuma mu, guadzibea, skuul na mbeambea ahorow pii noara so yɛ adze a no ho hia araa yie. Yɛwɔ ahoma ahorow pii na biara kitsa enyinamkandzea ahoɔdzen dodow a otum fa. Bi tum fa dza ɔwɔ sor na bi so fa dza ɔwɔ famu. Mpɛn pii no, nkorɔfo pii nnhwɛ ɔnam no bo no ntsi. Ne dze ara nye dɛ woenya kandzea wɔ ne fie ntsi wotum tɔ no mu biara dze yɛ hɔn edwuma. Ɔnam dɛ dɛm ahoma pɔtsee no nntum mmfa enyinamkandzea n’ahoɔdzen a ɔfa mu no ntsi, otum dɔ bor do ma gya tum tɔ mu. Iyi tum dze gyahyeyew a ano yɛdzen ba.
Ɔtɔ do bio nye nhwɛhann a yɛyɛ no wɔ hɛn efiefie mu na ndwuma ahorow mu. LPG so yɛ adze kor a otum dze ogya hyehyew ba. Hɛn nyinara nyim dɛ LPG na gya yɛ adze a wɔnnka koraa. Sɛ yenya haw wɔ adakaba kyɛnse a yɛtɔ gaase gu mu no a, yɛnnsiesie anaa yɛnnsesa .Gaase no tum fa ho hyee nkakrankakra na sɛ hɛn tsir annyɛ yie na sɛ obi a onnyim dze gya bɛn ho a, otum tɔ mu ma fie hɔ na mpo nyimpa a wɔwɔ hɔ hyew pirapira ma binom so wu. Mpɛn pii no, sɛ nkorɔfo ronoa edziban a, wotum gya hɔ kɔhwɛ tɛlɛbihyɛn na binom so mpo hɔn werɛ fir ma wotum fa mu da. Edziban no tum hyew ma gya tɔ mu. Sɛ gya no tɔ mu a, otum suo biribi mu wɔ gyaadze hɔ ma ɔhyew araa ma gya no yɛ kɛse. Gya no tum hyew kɔ beebiara wɔ fie hɔ. Aso bisa wo ho dɛ sɛ iyi si anafua a obiara adeda na wusiw agye beebiara abɔdo a, ebɛn asɛm na obesi? Yɛtaa tse dɛm nsɛm yi pii a ɔnnyɛ asɛm pa.
Bio, dza otum dze gya hyehyew ba nye sigaratse no nnomee. Sigaratse no nnomee abɛgye ehin wɔ ɔman Ghana mu na no ho nsunsuando do so remen hɛn. Gyahyehyew yɛ no ho nsunsuando no mu kor. Sɛ Obi nom sigaratse na no werɛ fir na oenndum no na ɔtow kyen a, otum suo biribi mu mu ma ɔhyɛ ase hyew. Sɛ ɔhyɛ ase dɛ ɔrehyew na enyi annkɔ ho anaa obi enndum n’ano gya no a, gya no tum sɔ tserɛw hyew ndzɛmba dze gyahyehyew ba. Bi mpo tum hyew kɛka obi ne fie anaa obi n’edwuma bi a ɔbɛn hɔ mu.
Hɛn anaa kaar a mfomdo ba ho a wonnsiesie so yɛ kwan kor a gyahyehyew nam do ba. Ɔnam dɛ hɛn no yɛ efir ntsi, ɔhaw tum ba ho ber a hɛn enyi nnda. Ahoma a ɔwɔ kaar no ho no bi tum ba haw, bea a wɔdze nsu gu anaa bea a wɔdze fangoo gu no so ho tum tɔ kyew naaso yebu hɛn enyi gu do. Hɛn no no bi mpo tum dɔ bor do ber a ogu do nam kwan do na sɛ ɔba dɛm na hɛnkanyi no enngyina ammfa yie annto yie a, opun wusiw araa ma gya tum tɔ mu hyew.
Dza otwa tun a ɔdze gyahyehyew ba nye haban anaa efuw ne nhyewee. Kwan kor a ekuafo fa do siesie hɔn haban dze tweɔn adɔw ber nye dɛ wɔbɛhyew hɔn haban. Yɛwɔ kwan ahorow a yetum fa do hyew haban a ɔnnkɛfa ɔhaw anaa gyahyehyew biara mmba. Mbom sɛ yɛammfa dɛm kwan pa no do na sɛ yɛyɛ no biarabiara a, gya no tum dzɛw dzendzendzen ma ɔtɔ obi ne haban anaa fie bi a ɔbɛn hɔ no mu ma no so hyew.
Iyi na pii a ɔkeka ho na otum ma gyahyehyew ba na sɛ yɛhyɛ dɛm ndzeyɛɛ yi nsew na yetutu hɛn anamɔn yie a, gya hyehyew no do bɛtsew.
