Mber kakra a abɛsen kɔr no na ɔbɔtɔ gua dɛ kwankyerɛfo a ɔda Esuantse Mantɔw mu NSS ano no edzi enyiambɔhosɛm etsia Manhyia ayarsabea anɛɛsefo. Nsɛm no ne nkyerɛ mu nye dɛ, nɛɛsenyi kor nye ne ba a no so yɛ datser wɔ ayarsabea hɔ nyaa akasaakasa a Owura yi kegyinaa ne ba no ekyir keka nsɛm a ho nnhia kyerɛɛ ewuraba no a ne ba no nye no enya asɛm no. Iyi nam do ma Owura Opoku Mensah kaa nsɛm a ontwa yie dze tsia esuafo a ɔayɛ na binom so gudo rosua fa adzesua ne fa a wɔfrɛ no General Arts wɔ mpanyimfo nsɔwdo skuul. Dodowara na wɔkasaa tsiaa dza Owura yi yɛe ber a asɛm no bɔtɔɔ gua no.
Mpanyim hyɛɛ Owura Opoku Mensah dɛ ɔmbra mbɛpakyɛw wɔ dza ɔyɛe no ho osaindɛ dza ɔyɛe na nsɛm a ɔkae no nntwa yie. Owura Opoku Mensah gyee too mu na ɔdze n’apakyɛw nsɛm too gua. Nsɛm a ɔdze too gua wɔ facebook no nye dɛ, “Mepa obiara kyɛw wɔ dza meyɛɛ no ho na mehyɛ bɔ dɛ ndzeyɛɛ a ɔtse dɛm no rinnsi bio. Metse ase ɔhaw a menam me ndzeyɛɛ do dze abrɛ obiara na mpo Manhyia ayarsabea anɛɛsefo na edwumayɛfo nyinaa.
Asɛm yi ekyir no, ɔbɔtɔ gua bio dɛ anɛɛsefo a wɔwɔ Manhyia ayarsabea no esi gyinae dze ato mpanyimfo enyim dɛ wɔnhwɛ mpam Owura Opoku Mensah dɛ Esuantse Mantɔw mu NSS kwankyerɛfo ɔnam suban a ɔdaa no edzi kyerɛɛ hɔn no ntsi. Mpempendo yi dze, anɛɛsefo a wɔwɔ Manhyia ayarsabea dze abɔto gua dɛ wɔrehyɛ etuatsew n’ase wɔ Fida, Mumu 2, 2022.
Panyin a ɔda anɛɛsefo nkabɔmukuw ano wɔ Esuantse Mantɔw mu, Jones Afriyie Anto so ze ne nsɛm too gua dɛ, anɛɛsefo a wɔwɔ Manhyia ayarsabea rehyɛ etuatsew no ase wɔ Fida na afei ɔbɛma no nkorɔfo a wɔwɔ Esuantse Mantɔw mu no nyinara so atwe hɔn dwumadzi asensan wɔ Dwowda, Mumu 5, 2022. Ɔtoaa do dze too gua bio dɛ, kuw no bɛma no nkorɔfo a wɔwɔ ɔman Ghana mu nyinara so atwe hɔn dwumadzi asensan sɛ mpanyimfo annhwɛ annyɛ hɔn apɛdze amma hɔn a.
Owura Jones Afriyie-Anto kyerɛɛ dɛ kuw no edzikan dze asɛm no akɛma aporisifo dada na worinngyaa asɛm yi mu kɛpem ber a wobeyi Owura Opoku Mensah edzi efi ne dzibew no do dɛ NSS kwankyerɛfo.
