Ghana ɔdwontonyi a ne dzin dze Alfred Benjamin Crintsil a dowdowara frɛ no AB Crentsil n’eyiyɛ akɔdo wɔ, Ɔbrɛfɛw, 5, 2022 wɔ Tema brɔn a no nɔmba yɛ awɔtwe (community 8). AB Crentsil toaa nananom wɔ nsew do wɔ Ayɛwoho, 13, 2022 a nna ɔyɛ Wukuda. Wɔwoo no wɔ afe 1943 mu wɔ Tarkwa-Pestea, Nna ɔdwontonyi yi ka adwontofo ekukudam ebiasa a wɔagye dzin wɔ ɔman Ghana highlife ndwontow no mu.
AB Crentsil no ndwom a ɔdze too gua no dɔɔso ara yie na hɔn mu bi nye Atia, Ayen, “I go pay you tomorrow”, Papa soma “Yɛwɔ adze a oye”, Angelina na pii a ɔkeka ho. Ɔdwontonyi AB Crentsil na ɔgyee “Frɔmtɔnfɔm evergreen” abawdobɔdze ɔnam no suahu na ne nyimdzee wɔ adwontow mu.
Ber a eyiyɛ no gudo rokɔ do no, ɔmanpanyin dadaw John Dramani Mahama dze ne yɛakɔ nsɛm kɔtoo gua dze ma ɔdwontonyi AB Crentsil a ɔnndaho nnka atseasefo ho bio .
Ber a ɔrekasa no, ɔma ebuasuafo, anyɔnkofo na adwontofokuw no nyinara hyɛdzen wɔ adze kɛse a wɔahwer no ntsi. Ɔmanpanyin dadaw Jonhn Dramani Mahama frɛɛ ɔdwontonyi a oenya ne beebi kɔr no “Okunyin wɔ ndwontow mu” ɔnam no mbɔdzenbɔ a ɔdaa no edzi ber a ɔtsease no. Ne nsɛm no bi nye;
“Ndɛ, hɛn nua na hɛn nyɔnko AB Crentsil nnhia hɛn hɔ hwee bio. Dza ohia ara nye dɛ, yɛbɔbɔ mpaa dze aserɛ ma Twerammpɔn Nyankopɔn ebuei ɔsor aheman mu ama no.”
Mpanyimfo ekukudam a wɔwɔ amanyɛkuw ahorow no mu pii noara na wokopue mu wɔ eyiyɛ no ase. Ekukudam bi tse dɛ, ɔsoafo a ɔhwɛ guadzi na ndwuma nsɛnsɛm do, Alan John Kyeremanten na Owura Julius Debra. Adwontofo pii so na wokopue mu wɔ AB Crentsil n’eyiyɛ no ase. Ewufosom no ekyir no, wɔdze ne mu no kɔr Ewoyaa, kurow bi a ɔbɛn Salpond, Fininfim Mantɔw mu akɔkora n’ekyir koraa. Ɔdwontonyi AB Crentsil dzii mfe eduosoun akrɔn (79) na ogyaa mba awɔtwe ka ne yer ho.
